台南出生的作者，對於南部尤其是高雄的海濱有著深刻的情感。她以台語詩的書寫方式紀錄了高雄海濱的故事，她的詩作就像一隻帶有感情的長鏡頭相機，感情豐沛的紀錄下高雄海濱的故事，有迷人的海邊景色，漁人的心情，蚵寮老者，港口情詩，海邊的悠久古蹟，作者用文字，寫出對海的想像、眷戀、與思念。對高雄海濱的濃烈情感，在本詩選集裡一無保留的傾洩而岀。

台灣，是一個海洋國家，但是，因為以前國民黨政府的自我封鎖，將「海」當作是禁忌，所以大部分的台灣人，其實無啥乜機會，會當好好認捌咱國家家己的地理環境，嘛毋知影咱台灣四周圍的海，是充滿著啥乜款的美麗佮哀愁。
徛佇台灣的南部，高雄，伊身為一個海洋首都，即款又溫柔擱熱情的城市，真正需要有詩來書寫屬於伊的故事佮記錄。所以，詩集內底有描寫大海佮漁民之間的生活苦澀佮歡喜、有描寫人佮海洋的感情酸甜、嘛有詩人觀看海洋、海岸景物的自在以及體會，遮的詩，就安呢充滿著深深的「海」的滋味。
台灣親像一隻海翁，即隻海翁嘛一直受著海洋的滋養。想欲出版即本台語詩集——《海》，是我為著欲寫咱鄉土上真的人情、世事佮風景，用上親切的母語——「台語」寫予咱的鄉土。
～二００八年‧夏天 寫佇高雄

〈我的厝〉
無起佇平地
是佇起起落落的水色頂面
好天的時
一片的深藍開闊
半暝
是充滿著烏暗的陰沈

我的厝邊
無鳥仔佇樹林內歡喜的話語
無蝶仔佇花欉邊採蜜的形影
但是，我
會當聽著海翁唱海底的民謠
一種深閣遠的歌聲
會當看著海豬逐天邊的白雲
一種舞蹈的輕巧

我的厝
是一隻遠洋飄浪的船








〈月下的夢〉
對船邊的窗仔外
掖落一區微微的光
月娘 用溫柔種作暗暝的夢土
佇即塊海洋的田園，相思的花欉
攏結做思念甜蜜的果
佇即塊海洋的田園，我是一個豐收的作穡人

摘自〈第一篇 鹹澀的海〉

林姿伶，佇台南縣出世，台南師範學院鄉土文化研究所畢業，即碼蹛佇高雄市。伊的感情豐富，心思敏感，寫情意的深，嘛寫現實的真。
自1995年開始，伊就開始以自己的母語——台語來寫詩。1995年8月20號佇台時副刊頂面發表「台語歌詩」——〈落雨暝〉。自此，就以台語來從事詩的創作，將作品陸陸續續發表佇台灣時報、台灣新聞報、民眾日報、自由時報、台灣日報的副刊，定定佇作品當中所表達的，是對台灣土地的愛佮疼惜。
即本台語詩集的出版，是逐家所期待的海洋詩創作，也是一種詩人寫作新風格的誕生，相信伊佇台語詩壇，會創造出燦爛的光采佮未來。