愛食番薯ê象

◎
成功大學台文系助理教授 陳慕真Tân Bō͘-chin
《愛食番薯ê象》是一本古錐ê繪本。
M̄-nā適合親子共讀，mā適合台語白話字ê學習。
這是有關一隻ài食番薯ê象—阿龍ê故事。
阿龍為 tio̍h beh 解決一个個 hō͘ 伊困擾 ê問題，去問 lâ-lí（鯪鯉）、 kiuⁿ-á-hó͘ （羌仔虎）、soaⁿ-iûⁿ （山羊）、soaⁿ-niau（山貓）、 soaⁿ-ti-á（山豬á）、 Tâi-oân o͘-hîm （台灣烏熊）。
阿龍有解決問題ê精神kap能力，最後tó 1 chiah動物ē解決阿龍ê問題--leh？
請gín-á兄、gín-á姊hian開chit本冊，kap阿龍做伙去chhōe答案！

◎
台語路協會理事長 董力玄 Táng Le̍k-hiân
Pêng-iú chhut chheh, jî-chhiáⁿ sī iōng-sim ūi gín-á siá ê Tâi-gí-kó͘, tong-jiân ài chàn-siaⁿ！
Him-î chham góa kāng-khoán sī ài kóng kò͘-sū ê a-bú, chi̍t-ê tī Tâi-lâm, chi̍t-ê tī Tâi-pak, in-ūi Tâi-gí lâi se̍k-sāi. I kóng, “ sī án-chóaⁿ lán kóng–ê lóng sī pa̍t-lâng ê kò͘-sū？Eng-kai mā ài ū ka-tī ê.” 《Ài chia̍h han-chî ê chhiōⁿ》chit pún chheh chū-án-ne lâi tàn-seng.
Kò͘-sū ê chú-tê sī gín-á lóng kài ū hèng-chhù ê “sái-jiō ōe-tê”. Lí kám ū siūⁿ kòe pàng-phùi ē-tàng pàng kah gōa hàm-kó͘？Lâi khòaⁿ A-liông ê seng-oa̍h lí tio̍h chai. Gín-á ē khòaⁿ kah chhiò-hai-hai！
Chhōe chi̍t chiah chhiūⁿ lâi chò chú-kak, chū-jiân sī ūi-tio̍h kò͘-sū hāu-kó: poe chiūⁿ thiⁿ iah-sī siak loh tē lóng chiok ū hūn-liōng！M̄-koh tû-liáu A-liông í-gōa, chheh lāi-té kî-thaⁿ tōng-bu̍t tio̍h lóng sī Tâi-oân chāi-tē ki-bîn, pau-koat lâ-lí, kiuⁿ-á-hó͘, soaⁿ-iûⁿ-á⋯⋯téng-téng, lóng ta̍t-tit lán ê gín-á lâi se̍k-sāi. Ē-tàng tī ōe-pún lāi-té khòaⁿ-tio̍h chāi-tē sò͘-châi, sī siá ka-tī kó͘-su ê tiōng-iàu ì-gī.
Gín-á chheh nā-sī lāi-iông chhù-bī ē-sái ín-khí tho̍k-chiá ê hèng-chhù, án-ne tio̍h sêng-kong chi̍t-pòaⁿ, koh thang sūn-sòa jīn-bat Tâi-oân tōng-bu̍t, tio̍h ū-iáⁿ sī bong lâ-á kiam sé khò͘！
Kám-siā Him-î ūi Tâi-oân gín-á chhòng-chō！Tē-it pún Tâi-bûn “sái-jiō” ōe-pún, sui-jiân tām-po̍h-á bô ūi-seng(?) m̄-koh sī pôe gín-á bat jī ê hó-pêng-iú ŏh！

◎
我是葉欣怡，府城人，進前是病院ê護理師，chit-má是國校仔ê台語老師，mā是2个查某gín-á ê阿母，阮用台語過生活，加上本身就真佮意繪本，定定講gín-á-kó͘予gín-á-tīn聽，彼當時就想講搭不時lóng leh紹介別人ê作品，tī 當時有機會會當講家己出ê繪本。有一工，阮ê cha-bó͘-kiáⁿ雄雄講tio̍h放屁，規家伙仔笑 kah péng-kòe，阮bó-á-kiáⁿ 就開始做伙編故事，我來寫做台文字稿，koh加入本土tit-beh滅絕ê動物做配角，向望有koh較濟人會當了解in，這本冊就按呢出世ah。