◎台灣俗語詳解，詳列常用字詞正確讀音與應用方式。
◎每一講主題延伸華台語對照、生動台語歇後語故事，加強學習印象。
◎結合台灣處境、時事、國際關係做為俗語使用範例，落實語言的生活化學習。

俗語，是世俗的智慧語言，它是人生的經驗哲學，也是語言的藝術，利用幾個字就能表達世間酸甜苦辣的現象。懂得利用俗語，一句就能抵萬言，也可增添說話的風情與內涵。

台灣俗語也是台灣人民經歷許多歷史與變遷累積出來的語言精華，不但蘊含台灣本地的風俗人情，同時也展現台灣人的處世智慧，活在這塊土地的人，都可以去親近理解，以了解先人生活與奮鬥的足跡。

本書作者巫義淵為台灣語文專家，有感於台灣語言逐漸為大家所遺忘，所以戮力完成本書，本書共分十八講，每講再分解讀、正音、台華語對照......等，系統井然有序，帶領讀者一親母親語言的芳澤。

闡談俗語
俗語，是世俗的智慧語言，它是人生的經驗哲學、亦是語言的藝術，利用幾個字就會當來表達世間頂所抵着的鹹、酸、甜、苦、飷、澀佮必然現象，亦就是講，用簡單的一兩句話，就會當來析剖人生的萬項事誌。親像講：抑雞不成菢 [ah-ke m̄-chiâⁿ-pū] ，真簡單五字 kā 咱講，雞若無想欲菢卵，用強抑、強迫的方式絕對菢bē成功，用這句話猶會當借鏡 [chià-kèng] 、來奉勸人對社會世事的處理方式愛細膩，凡事愛有互動的關係來做，用強迫--的定規做無好事誌。
有人講語言只是溝通的工具但定 [nā-tiāⁿ]、聽有就好，事實上根本就不是按呢，用俗語來做比喻就會當真清楚了解，一個人對語言文化若無充分的感受，干乾聽有就好，按呢敢會成做文明人？親像：物件伊做的 [mi̍h-kiāⁿ I chò--ê] ，台語是指咱咧看的物件是伊做的(已經咧看)，伊做的物件 [I chò-ê mi̍h-kiāⁿ] ，是指咱欲看伊做的物件(猶未看)等，千百句這款正反 [chiàⁿ-péng] 倒反、鋩鋩角角 [mê-mê / mî-mî kak-kak] 的台語，若無學、是欲按怎聽有就好咧？
這本冊是用俗語做主題來探討台語的媠，嘛是共款欲來了解正確的台語書寫佮讀音，會當帶來予大家了解台語的研習嘛是需要多方面來，向頭 [àⁿ-thâu] 、向望 [ǹg-bāng] 、向前 [hiòng-chiân] 直進，行出咱自己的路、行出咱台灣人的尊嚴。

第一講【抑雞不成菢】[AH-KE M̄-CHIÂⁿ-PŪ]
這是一句用雞菢卵來做比喻的俗語，kā咱講，若用壓制的方法、強要求人來就範，叫伊做無願意做的事誌 [tāi-chì] ，做--起來一定bē順利周至，用來提醒咱，若用強硬的手段來迫人屈服，凡事定規(一定)無法度得着圓滿的成果。
【菢】 [pū]＝菢卵 [pū-nn̄g / nūi] 雞鳥禽類覆蛋的意思。
【抑雞】 [ah-ke / koe] 強制壓迫雞就範。
【不成】 [m̄-chiâⁿ] bē齊全 [chiâu-chn̂g] bē周至的意思。
雞母若生卵到一個坎站 [khám-chām]，自然家己會菢卵，這是天生自然的法則，若是生卵猶未到坎站，硬抑雞母菢卵，根本無法度達成目的，除了卵菢bē出以外、連卵嘛會被反抗的雞踏踏破。這句俗語是kā咱講，凡事愛順其自然尊重人權，用強迫的方法，人無一定會就範，有時陣若反抗倒彈 [tò-tōaⁿ] ，往往 [éng-éng] 會事得其反，假使若無反抗，嘛共款無法度得着預期的效果。
中華人民共和國佇1949年建國以來，前四十冬攏用高壓強迫的手段，叫百姓做che做he，士農工商攏無家己發揮的空間，規個社會機制原地停滯、甚至退步，造成農工業、經濟等落後數十冬，以農業為例，中國幾千冬來是以農立國，每年穀類竟然依賴進口一兩千萬噸以上，百姓三餐不繼，貧病交加哀號偏野！這是強權壓制下所產生的事實。1991年間台南有一位本身有患糖尿病的醫生，隨團去中國chhit-thô，出門的時疏忽未記得chah糖尿病的注射藥 Insulin，致使佇中國拖命旅遊幾若日，一項真普通的藥物，竟然走遍中國兩三省的人民病院尋無這款藥，無法度，這位朋友放棄旅遊提前回國。共團猶有一位朋友，伊所chah去的Camera(相機)電池無電，嘛共款走七省，尋無這款規格的電池，其實這款電池是全世界普偏咧使用的規格，因按呢，續無法度翕像來記錄旅遊行程的點滴、遺憾此行也！據講，近來托台商《錢進中國債留台灣》之福，沿海地區佮觀光景點進步真濟，總是，全中國有七八成的內陸地區，落後的情形猶相當嚴重，百姓的年收入平均不及兩百美元(指內陸)。除了頂面所講的以外，其餘用強迫壓制所產生的反作用事件猶真濟，包括社會、宗教、政治等不勝枚舉，六四天安門事件佮”法輪功”反抗事件即實例也。
三腳仔 的事例：
1955年代，高雄有一個姓蔡的少年家，出身低階層的家庭，自細漢就佇夜市仔做工度日，佇一個偶遇然的機會，熟似一個警總的特務，就按呢一方面做爪耙仔，一方面” 猴榜虎威 [kâu pn̄g-hó͘-ui] ” 靠勢來魚肉街鄰欺壓鄉親，因按呢尻脊後大家攏加號做三腳仔，對於伊的行為，夜市仔的生理人攏敢怒不敢言，表面上哪親像對伊真歡迎真配合的款式。鄉親除了月月愛付保護費以外，過年過節愛加收禮金，三不五時仔特務in kiáⁿ 欲做生日、in老父做滿月、in老母做度晬等，攏愛特別追加預算。幾若冬落來，三腳仔攏習以為常，計是(以為)大家攏對伊足好，不知影尻脊後大家攏kiāu-ka̍h無一塊好！
有一日，三腳仔佮特務做伙去屏東，扑算是去做欺壓台灣人的事誌 [tāi-chì]，倒返來的時，佇高屏大橋發生車禍，特務當場死亡、三腳仔着重傷，因按呢三腳仔續殘廢。過了後，三腳仔自按呢生活發生問題，四界向人求助，因為無特務通來倚靠，攏無人願意伸出援手，這寡原本三腳仔計是(以為)對伊真好的鄉親，一個一個攏閃離離，對這位利用惡權來欺壓人的朋友，大家攏無想欲koh佮伊交陪。三腳仔就佇貧病交加，又koh求助無門的環境下，無兩三冬就結束生命！
頂面兩個例kā咱講，人佮人的互動關係，四方互重 [sì-pang hō͘-tiōng]，以善待人、以德服人，用實質能力來信服大眾，不是用霸道來控制人權、用金錢來買權力，親像三腳仔利用惡勢力來佮鄉親建立友誼，歸尾所得着的是虛假無實的友誼，這就是”抑雞不成菢” 的警世道理。
【本文曾發表tī海翁台語文學第42期2005.06】
台灣俗語解讀 [Tâi-oân sio̍k-gí kái-tho̍k]
【鴨蛋較密嘛有縫】[ah-nn̄g / nūi khah-ba̍t ma-ū-phāng]
卵殼有真濟目睭無看着的微小毛細管，所以若用鹽水豉就會變做鹹卵，若用鹼性的物質佮碳酸鈉浸漬，就會變做「皮蛋」。因按呢早期的人就理解、看起來密密的卵，大家不通計是(以為)真正足密--的，其實是有「縫」(毛細管) 的。這句俗語是佮華語的「紙包不了火」的意思類似，就是講：若欲人不知，除非己不為、的含意。
【鴨母妝金身、亦是扁嘴】 [ah-bú / bú chng-kim-sin , á-sī píⁿ-chhùi]
人咧講：江山可改，本性難移；這句俗語是咧講、本性若定型，無論用甚麼方法來包裝掩蓋，嘛是無法度改變，所以用這句「鴨母妝金身、亦是扁嘴」來形容這個道理。
【鴨寮內無隔暝肚蚓】[ah-tiâu-lāi bô-keh-mê-tō͘-ún]
一般來講，鴨是一種有食物就會無歇睏一直食到完為止的動物，所以若將肚蚓囥入去鴨寮內，隔暝鴨寮內定規無法度看着猶有肚蚓。這句俗語咧kā 咱講：真濟所謂的「深藍(殖民者)、佮泛藍(倚殖民者)的人」，in 利用這塊連自己都無合意的「中華民國」看板(招牌)，在台灣kā 咱欺騙踐踏幾若十冬，好孔的永遠食bē 完，in 逐個現此時猶咧享受榮華富貴，嘛繼續咧出賣台灣？！端看這寡一向攏以殖民者的爪牙幫兇咧欺負台灣人的將軍爺，爭先恐後去朝貢唱中國國歌、就會當證明一切也。
【甕底扑不見鼊(鱉)】[àng-té phah-m̄-kìⁿ pih]
甕是一種肚大口細的缸仔類盛器，龜鼊類若入佇甕內，絕對無法度sô 會出來。這句俗語是咧表示：奇怪？無可能發生的事誌，竟然發生。
【紅柿若出頭，羅漢腳仔就目屎流】[âng-khī nā-chhut-thâu , lô-hàn-kha-á tio̍h-ba̍k-sái-lâu]
紅柿的生產期，攏是秋季以後、接近冬天。早期一寡渡海來台灣的人、攏是一箍人來欲尋機會發展，但是多數往往攏尋無比較好的出路，除了有部分願意hō͘ 平埔原住女子民招(入贅)、算較好運以外，多數獨身的羅漢腳仔，無某無猴，睏、睏豬砧(豬肉擔)，洗面剃頭店，所以紅柿若開始出的時陣，這寡羅漢腳仔就開始煩惱。這句俗語是kā 咱講，社會甚麼境遇、甚麼款人就愛煩惱。
【紅花bē香、香花bē紅】 [âng-hoe bē / bōe-phang , phang-hoe bē / bōe-âng]
花的種類中，真濟紅色的花攏bē 香，會香的花嘛攏不是紅色--的。這句俗語是咧kā 咱講：真正 gâu 的人bē 臭屁，頇顢的人顛倒 gâu 臭彈 [chhàu-tōaⁿ] ，這是一句警世的俗語。


常用字詞正確讀音佮應用
抑 有四个讀音：1.*ek (益) 2.ah (鴨) 3.á (仔) 4.iá (野)。這字雖然是常用字，但是真正會曉讀音應用的人足少。第一個讀音：ek、是本音，有幾個含意：(1).壓制、阻止。例如：抑制 [ek-chè] ，抑糴 [ek-tia̍h] 。(2).憂悶、貶損。例如：抑鬱 [ek-ut] 、鬱卒的意思，抑揚扶弱 [ek-iông hû-jio̍k] 。第二個讀音：ah、是管轄，佮強壓的意思。例如：抑勒 [ah-la̍h] 、管轄的意思；抑扼 [ah-lek] ＝強壓的意思。第三個讀音：á、是助詞；倒反問的話。例如：抑不是曷呢 [á-m̄-sī at-ni] ？(華語還不是這樣)。註：曷呢＝按呢。第四個讀音：iá、是連詞，用佇反問的話。例如：是抑不是 [sī iá-m̄-sī] ？現此時後面這兩個 iá 佮 á 攏分bōe 清楚，一般攏混合使用。

重點字詞：
【抑】1.*ek (益) 2.ah (鴨) 3.á (仔) 4.iá (野)
【抑不是】 [iá-m̄-sī] (冶m̄視)
【抑扼】 [ah-lek] (鴨慄)
【抑揚】 [ek-iông] (益容) 抑揚扶弱。
【抑不是】 [á-m̄-sī] (仔m̄視)
用例：
俗語講：「一樣米飼百樣人」，世間頂有真濟人、平常時若咧講話攏條條是道理氣十足，往往烏--的、講 kah 變白--的；嘛有人親像真有正義感的款式，但是遇著一寡事誌需要伊仗義執言的時陣，伊卻連一句【是抑不是】 [sī iá-m̄-sī] 著抑不著 [tio̍h iá-m̄-tio̍h] ，都不敢斷言講出嘴，不過這款人、卻會當佇社會受著敬重，甚至大家猶認為伊是真好的人，因為社會遇著難題需要伊豎出來講公道話的人，究竟猶是極少數。古早人咧講：「公道自在人心」，原本佇逐個人的心肝內就有公平正義的存在，總是這款公平正義，因為受個人貪婪因素佮社會環境的影響，每一個人的感受標準攏無仝，有的人雖然有良善的心，卻因為言行有上司【抑扼】 [ah-lek] 的掛慮，無法度、嘛是愛講一寡543的白賊話來應付；嘛有一寡平常時佇電視頂面的言論表現，哪親像是一個【抑揚扶弱】 [ek-iông hû-jio̍k] 袒護弱勢者的人，對殖民者的壓霸有厭惡的款式，但是若遇著關鍵的時陣，伊就180度躠翻頭來支持霸凌的殖民者，歸尾【抑不是】 [á-m̄-sī] oân-nā 繼續咧做殖民者的幫兇爪牙！

華台語對照 [Hôa-Tâi-gí tùi-chiàu]
【挨罵】[ai-mā] 台語應該講：予人罵 [hō͘-lâng-mē / mā] ＝受
責罵個意思。
【挨餓】[ai-gō] 台語應該講：枵飢失頓 [iau-ki sit-tǹg] ＝遭受枵餓個意思。
【矮牆】[ái-chhiông] 台語應該講：低牆 [kē-chhiûⁿ] 。
【矮櫃】[ái-kūi] 台語應該講：低櫃 [kē-kūi] 。
【渥恩】[ak-un] 台語應該講：厚恩 [hō͘-un / in] 。
【宴坐】[iàn-chō] 台語應該講：安靜坐 [an-chēng-chē] 。
【痷病】[am-pēng] 台語應該講：半遂 [ piàn-sūi ] 。半遂＝半身不遂。

文音導讀 [Bûn-im tō-tho̍k]
台灣人因為長期受漢文化的影響，社會的書寫多數攏慣勢使用漢字，雖然這個文化不是咱所合意的，總是大環境就是按呢，無奈何[bô-tâ-oâ ] 嘛是愛勉強來接受這個事實。嘛因按呢真濟言詞難免愛用文白勾破參雜、才有法度正確來表達話語的含意，例如：圓環[îⁿ-khoân]，圓滿 [oân-boán ] ，滿月[móa-goe̍h]；人道[jîn-tō]，人客[lâng-kheh]，成長 [sêng-tióng] ，長進 [chiáng-chìn] ，長壽 [tiông-siū] 等幾若百句；特別是成語攏一定愛用文音來閱讀，例如：百孔千瘡 [pek-khóng chhian-chhong]，百聞不如一見 [pek-bûn put-jû it-kiàn] ；因按呢文言音若bē 曉，真濟文章讀--起來，定規會不倫不類，所以學台語、真濟漢字的文音一定愛會曉讀，才有法度充分來表達台語文白混音的媠。
文音的導讀資料真濟，但是欲尋有連貫性、又koh無重複的詩文來做閱讀練習，實在無容易，看看咧、oân-nā 是周興嗣著作的千字文來用上合。無管內容是如何，咱主要kan-nā 欲學文言音的閱讀但定 [nā-tiāⁿ ] 無欲加以詮釋，向望大家逐字的讀音攏會當記--起來，後日就有法度活用。

巫義淵
現任/ 台南市台灣語文學會榮譽理事長、國立成功大學台灣文學系助理教授級兼任專家

1940年9月28日出世佇彰化縣田中，終戰後遷居高雄市，1953年參加高雄天主教西樂團奠定音樂基礎，1956年被網羅加入教會合唱團，並承蒙李庭茂老師指導學習聲樂，1960年參加高雄市立管弦樂團擔任French Horn (法國號)手。因為斯當時的教會多數攏是唱拉丁文聖歌的關係，自按呢無意中會曉閱讀白話字。家父巫修1888年出生，十外歲就受洗信奉天主教，精通白話字、四書五經、以及漢醫藥等，雖然曾擔任過幾若冬先生，但是後來退出、選擇從商。樂聲的音感佮序大人的言談，攏是造就筆者台語發音標準化的主要因素。
1945年終戰後歷經國民黨政府的經濟掠奪，一冬外物資長價七八百倍、四萬換一箍新台幣，二二八大屠殺等，家庭由富有輾轉成做平凡。筆者成長期歷盡頂面的遭遇，亦因家兄受『白色恐怖』冤獄十年之影響，無光宗耀祖的資歷，只有真濟不堪回首的人生旅程！願咱的語言文化永續常存，天佑台灣！